Вӑрмар районӗнче ҫӗнӗ пуҫлӑха ҫирӗплетнӗ. Ку должноҫри ҫынна палӑртмалли пуху паян, ҫурла уйӑхӗн 20-мӗшӗнче, иртнӗ. Пухӑва районти тӳре-шарапа пӗрлех республикӑри пуҫлӑхсем те пырса ҫитнӗ.
Депутатсем паянхи ларура пӑхса тухнӑ ыйтусем пуҫлӑх суйлассипе ҫеҫ ҫыхӑннӑ. Конкурсра Дмитрий Иванов тата Леонид Степанов ҫӗнтернӗ.
Пухура иккӗшӗнчен пӗрне суйлама тивнӗ. Депутатсем Дмитрий Иванов кандидатурине ырланӑ.
Паянтан, сӑмах май, Улатӑр хулин администрацийӗнче ҫӗнӗ пуҫлӑх ӗҫлеме тытӑннӑ. Ҫак должноҫре Сергей Лукишин тӑрӑшӗ. Ӑна тилхепене тыттарассипе ҫыхӑннӑ пуху ҫурла уйӑхӗн 13-мӗшӗнче иртнӗ.
Вӑрмар районӗнчи пӗр ҫуртра пушар тухнӑ. Инкеклӗ лару-тӑру министерстви пӗлтернӗ тӑрӑх, ку инкек утӑ уйӑхӗн 28-мӗшӗнче 11 сехет те 31 минутра Кивӗ Вӗренерте пулнӑ.
Ведомство специалисчӗсем палӑртнӑ тӑрӑх, пушар ачасем шӑрпӑкпа вылянӑран тухнӑ. Шел те, пушарнӑйсем темле тӑрӑшсан та ҫурта ҫӑлса хӑварма май килмен. Юрать-ха, ачасем хӑйсем шар курман.
Малтанлӑха палӑртнӑ тӑрӑх, тӑкак 1 миллион тенкӗпе танлашнӑ. Сӑмах май, ҫав талӑкра республикӑра 6 пушар пулнӑ. Телее, вӗсенче аманнисем, вилнисем пулман.
Вӑрмар районӗнчи Ямпай ялӗнчи клуб пилӗк ҫул каяллах япӑхнӑ. Никӗс, стенасем ҫурӑлса пӗтнӗ, ҫивитти шӑтнӑ, чӳречесемпе алӑксем ҫӗрӗшнӗ.
Ялти хӑш-пӗр хастар пӗрех клуб пирки ӗмӗтленет, ӑна юсамалла, уҫмалла, ӗҫлеттермелле тесе шухӑшлать. Ялти пӗр хӗрарӑм Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаева ҫӑхавланӑ. Вӑл пӗлтернӗ тӑрӑх, район администрацийӗн пуҫлӑхӗнче ӗҫленӗ Андрей Васильев ҫӗнӗ клуб туса пама шантарнӑ. Вырӑнти ял тӑрӑхӗ культура учрежденине юсама тытӑннӑ. Ҫивиттине юсасшӑн, чӳречесемпе алӑксене ылмаштарасшӑн, ытти хӑш-пӗр ӗҫе пурнӑҫласшӑн. Анчах укҫа ҫукки пӗтерет. 2,45 миллион тенкӗ кирлӗ.
Паян ялта Олег Николаев пулнӑ. Вӑл Строительство министерствине ыйтӑва тишкерме хушнӑ.
Паян Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев паян Вӑрмар районӗнче пулнӑ. Вӑл район центрӗнчи «Колосок» (чӑв. Пӗчӗк пучах) 2-мӗш ача пахчинче юсав ӗҫӗ епле пынипе паллашнӑ. Паллашнӑ та тӗлӗннӗ.
Шкул ҫулне ҫитменнисен учрежденине юсассипе ҫыхӑннӑ документацие мӗнпур ӗҫе кӗртмен иккен.
Ача пахчин ертӳҫи Эльвира Васильева ӗнентернӗ тӑрӑх, планпа палӑртнӑ ӗҫсен 80 процентне вӗҫленӗ. Чӳречесене, ӑшӑ пӑрӑхӗсене ылмаштарнӑ, ҫивиттине юсанӑ. Шыв тата канализаци пӑрӑхне ҫӗнетмелле, сантехникӑна улӑштармалла. Ҫав вӑхӑтрах алӑксене ылмаштарассине, кӗрсе тухмалли ҫула юсассине тата ытти хӑш-пӗр ӗҫе шута илмен. Олег Николаев кӑлтӑка ҫывӑх вӑхӑтра пӗтерме хушнӑ.
Кӑҫалхи пӗрремӗш ҫур ҫулта пирӗн республикӑра пневмонипе 6 556 ҫын чирленӗ. Пӗлтӗрхи ҫав вӑхӑтрипе танлаштарсан ҫакӑ 2,1 хут ӳснӗ, ытти ҫулсенчи вӑтам кӑтартуринчен 2,5 хут нумайланнӑ. Ҫак цифрӑсене Роспотребнадзорӑн Чӑваш Енри управленийӗ пӗлтернӗ.
Вирус пуҫарнӑ пневмонипе 1 351 ҫын чирленӗ. Бактери пневмонийӗ 1 902 пациента ҫакланнӑ.
Ҫӗртме уйӑхӗнче пневмонипе пӗлтӗрхи ҫав уйӑхринчен 5,7 хут ытларах чирленӗ. Кӑшӑлвируса пула пуҫланнӑ пневмонипе чирлекенсем Шупашкар, Ҫӗнӗ Шупашкар, Канаш, Ҫӗмӗрле хулисенче, Шупашкар, Ҫӗрпӳ, Етӗрне, Хӗрлӗ Чутай, Вӑрнар, Комсомольски, Елчӗк, Вӑрмар, Канаш, Тӑвай районӗсенче уйрӑмах нумай шута илнӗ.
Ӗнер республикӑра ҫанталӑк тӗлӗшӗнчен лӑпках пулчӗ-ха. Анчах хӑш-пӗр тӑрӑхра пӑр ҫунӑ иккен.
Утӑ уйӑхӗн 27-мӗшӗнче Вӑрмар районӗнчи Пысӑк Енккасси ялӗнче 11 сехетре ҫумӑр ҫума пуҫланӑ. Кӑштахран ҫил те вӑйланнӑ. Унччен те пулман – пар ӳкме тытӑннӑ.
«Про Город» хаҫата халӑх корреспонденчӗ каласа кӑтартнӑ тӑрӑх, пӑр 20 минута яхӑн ҫунӑ. Вӑйлах ҫунӑран ҫынсен панулми те тӑкӑнма пуҫланӑ.
Чӑваш Енри тата тепӗр районта пуҫлӑх шыраҫҫӗ. Паян, утӑ уйӑхӗн, республика Элтеперӗн тивӗҫӗсене вӑхӑтлӑх пурнӑҫлакан Олег Николаев республика шайӗнче конкурс комиссийӗ йӗркелесси ҫинчен хушу кӑларнӑ.
Утӑ уйӑхӗн 17-мӗшӗнче Вӑрмар районӗнче Депутатсен пухӑвӗн ларӑвӗ иртнӗ. Унта депутатсем муниципалитетӑн пуҫлӑхӗнче ӗҫленӗ Андрей Васильевӑн заявленине пӑхса тухнӑ. Вӑл пуҫлӑх пуканне хӑйӗн кӑмӑлӗпе пушатма йышӑннӑ. Депутатсем заявление пӑхса тухса ырланӑ.
Тилхепене урӑх ҫынна тыттариччен тивӗҫе район администрацийӗн пуҫлӑхӗн пӗрремӗш ҫумӗ – йӗркелӳпе тӗрӗслев тата кадр ӗҫӗн пайӗн пуҫлӑхӗ Николай Павлов пурнӑҫлӗ. Ҫапла йышӑннӑ депутатсем.
Ҫанталӑк шӑрӑх тӑнӑ чух ватти-яшши шыва кӗме васкать. Анчах, шел те, инкексем те пулаҫҫӗ. Паян Правительство ҫуртӗнче шыври хӑрушсӑрлӑх ыйтӑвне сӳтсе явма ятарласа ларӑва пуҫтарӑннӑ.
Утӑ уйӑхӗн 20-мӗшӗ тӗлне 19 ҫын путса вилнӗ. Вӗсен йышӗнче — икӗ ача.
ГКЧС ертӳҫи Вениамин Петров шыва путакансен шучӗ пӗлтӗрхи танлаштаруллӑ тапхӑртинчен 25 процент ӳснине пӗлтернӗ. Муркаш районӗнче 9 ҫын шыва путса вилнӗ, Ҫӗнӗ Шупашкар хулинче — 4, Канаш районӗнче — 3, Вӑрмар районӗнче — 2.
Инкексем ишме ирӗк паман вырӑнсенче пулса иртнӗ. Тепӗр тесен ялсенче: «Шыва кӗме юрамасть», — тесе асӑрхаттарнипех ҫырлахаҫҫӗ. Пӗве-кӳлле ятарласа хатӗрлеме васкамаҫҫӗ. Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев ҫавна ырламан.
Ҫанталӑк шӑрӑх тӑнине кура ҫак кунсенче Чӑваш Енре те шыва кӗме аван. Шел те, путса вилекенсен йышӗ ӳссех пырать. РФ Инкеклӗ ӗҫсен министерствин Чӑваш Енри управленийӗнче пӗлтернӗ тӑрӑх, иртсе кайнӑ канмалли кунсенче пирӗн тӑрӑхри тӑватӑ ҫын пурнӑҫӗ татӑлнӑ. Ҫапла вара шыва путса вилекенсен йышӗ кӑҫал 17 ҫынна ҫитнӗ.
Эрнекун каҫхине Муркаш районӗнчи Шупуҫӗнче 74 ҫулти арҫын пӗвере путнӑ. Арҫын ҫипуҫне ачасем асӑрхасан аслисене пӗлтернӗ. Вилене шывран ял ҫыннисем кӑларнӑ. Малтанласа шухӑшланӑ тӑрӑх, арҫын эрех ӗҫнӗ пулнӑ.
Утӑ уйӑхӗн 11-мӗшӗнче Ҫӗнӗ Шупашкарти хула пляжӗнчен инҫех мар вырӑнта, Атӑлта, 19 ҫулти каччӑ виллине тупнӑ.
Ҫав кунах Вӑрмар районӗнчи «Тарӑн ҫырма» коллективлӑ пахча патӗнчи пӗвере 43 ҫулти хӗрарӑм путнӑ. Вӑл Кавал ялӗнче пурӑннӑ.
Шӑматкун Муркаш районӗнчи Ильинка ялӗ тӗлӗнче, Атӑлта, 55 ҫулти арҫын шыва путнӑ.
Утӑ уйӑхӗн 2-мӗшӗнче Вӑрмар районӗнчи Саруй ялӗ ҫывӑхӗнчи пӗвере арҫын путса вилнӗ. Вӑл 46 ҫулта пулнӑ.
Инкеклӗ лару-тӑру министерстви пӗлтернӗ тӑрӑх, пӗвере ҫав вырӑна шыва кӗмешкӗн туман. Арҫын вара ҫакна шута илмен – ҫавӑнтах чӑмпӑлтатма шут тытнӑ.
Шел те, ку инкекпе вӗҫленнӗ. Ҫитменнине, арҫын ӳсӗр пулнӑ. Унӑн виллине ял ҫыннисем тупнӑ, вӗсемех ӑна ҫыран хӗррине кӑларнӑ
+9.3 °C